Каракол шаардык “Тазалык” ишканасына унаалар тапшырылды
Каракол шаарында коммуналдык тармакты өнүктүрүү жана шаар тазалыгын камсыздоо багытындагы иштер уланууда. Каракол шаардык “Тазалык” муниципалдык ишканасына төрт жаңы кызматтык автоунаа тапшырылып, мекеменин техникалык мүмкүнчүлүгү бекемделди. Бул тууралуу шаардык мэриянын басма сөз кызматы билдирди.
Маалыматка ылайык, жаңы автоунаалардын ачкычын Каракол шаарынын мэринин орун басары Нурлан Момбеков тапшырып, ишкананын эмгек жамаатына ийгиликтерди каалады. Ал өз сөзүндө шаар тазалыгы – шаар маданиятынын күзгүсү экенин белгилеп, күн-түн дебей эмгектенип жаткан кызматкерлердин иши өтө жоопкерчиликтүү жана маанилүү экенин айтты.
Белгилей кетсек, аталган автоунаалар “Тазалык” муниципалдык ишканасынын ишин жакшыртуу, техникалык базасын чыңдоо жана коммуналдык кызматтарды заман талабына ылайык жүргүзүү максатында лизинг аркылуу алынды. Жаңы техникалар шаардын көчөлөрүн тазалоо, коммуналдык иштерди уюштуруу жана күнүмдүк кызматтык тапшырмаларды аткарууда пайдаланылат.
Шаар жетекчилиги мындан ары дагы коммуналдык кызматтардын ишин колдоо, кызматкерлер үчүн шарттарды жакшыртуу жана Каракол шаарынын тазалыгын, көрктүүлүгүн камсыздоо багытындагы иштерди уланта берерин билдирди.
