Мыйзамсыз курулуш жүргүзгөн кытайлык компанияга айып пул салынды
Суу ресурстары, айыл чарба жана кайра иштетүү өнөр жай министрлигине караштуу Жерди жана сууну көзөмөлдөө боюнча кызматтын Ош шаары жана Ош облусу боюнча аймактык башкармалыгы тарабынан “Цзю-Цзю-Си” ЖЧКсына карата текшерүүдө өзүнө бөлүнүп берилген жер аянтынан сырткары кошумча жер тилкесине мыйзамсыз курулуш жүргүзгөнү аныкталды.
Ошондой эле жердин күрдүү кыртышын алуу, сактоо жана жаткыруу боюнча талаптар бузулгандыгы белгиленди.
Суу ресурстары министрлигинин маалыматына караганда, аталган мыйзам бузуулар боюнча тиешелүү акт түзүлүп, протоколдор таризделди. Буга чейин жерди кайра калыбына келтирүү боюнча эскертүү берилсе да ал талап аткарылган эмес.
Натыйжада Кыргыз Республикасынын “Укук бузуулар жөнүндө” кодексинин 149-беренесинин негизинде 100 миң сом, ал эми 241-беренесинин негизинде 17 миң сом өлчөмүндө айып пул салынды.
Жерди жана сууну көзөмөлдөө боюнча кызмат жер ресурстарын мыйзам талаптарына ылайык пайдалануу боюнча көзөмөл иштерин улантат.
