3 жолу эреже бузгандардын айдоочулук күбөлүгү жокко чыгарылат
Министрлер кабинети айдоочулук күбөлүк берүү тартибин өзгөртүп, жаңы форматтагы убактылуу айдоочулук күбөлүктү киргизүү чечимин кабыл алды.
Жаңы эрежеге ылайык, авто мектепте кеминде 4 ай окуп, сынактан өткөн жарандар 6 айга жарактуу убактылуу күбөлүк алышат. Ал документ электрондук форматта берилип, Кыргызстан ичинде гана жарактуу болот.
Бул убакыт аралыгында жол эрежесин үчтөн аз бузган айдоочулар гана туруктуу айдоочулук күбөлүк ала алышат.
Эгер айдоочу жол эрежесин үч же андан көп жолу бузса, анын убактылуу күбөлүгү жокко чыгарылып, кайрадан авто мектепте окууга туура келет.
МинКаб бул өзгөртүү айдоочуларды сапаттуу даярдоо жана жол коопсуздугун күчөтүү максатында кабыл алынганын билдирди.
Токтом он күндөн кийин күчүнө кирет.
