Бишкекте мыйзамдуу жана коопсуз миграция маселелери боюнча борбор ачылды
22-майда Бишкек шаарында Европа Биримдигинин колдоосу менен Эл аралык миграциялык саясатты өнүктүрүү борбору тарабынан ишке ашырылып жаткан “PROTECT” долбоорунун алкагында түзүлгөн экинчи Мигранттар үчүн ресурстук борбордун ачылышы болду. Бул тууралуу Эмгек, социалдык камсыздоо жана миграция министрлигинен билдиришти.
Маалыматка ылайык, Эмгек, социалдык камсыздоо жана миграция министрлигине караштуу Жарандарды чет өлкөгө ишке орноштуруу борбору демилгени Кыргызстанда ишке ашырууда өнөктөш болуп саналат. Бишкек шаарындагы Мигранттар үчүн ресурстук борбор Эмгек министрлигине караштуу Жарандарды чет өлкөгө ишке орноштуруу борборунун имаратында жайгашат.
Борбордун ачылышы жарандардын коопсуз, уюшкан жана мыйзамдуу миграция боюнча ишенимдүү маалыматка жетүүсүн кеңейтүүгө, ошондой эле мыйзамсыз миграциянын, адам сатуу коркунучтарынын жана эксплуатациянын башка түрлөрүнүн тобокелдиктери тууралуу калктын маалымдуулугун жогорулатууга багытталган.
