Караколдо бош орундар жарманкеси өттү
Каракол шаарында жумуш издеген жарандар үчүн бош орундар жарманкеси уюштурулуп, ага шаардагы жана облус аймагындагы иш берүүчү мекеме-ишканалар, кесиптик техникалык окуу жайлардын өкүлдөрү, студенттер жана жумуш издеп жүргөн жарандар активдүү катышты. Бул тууралуу шаардык мэриянын басма сөз кызматынан билдирди.
Маалыматка ылайык, жарманкенин негизги максаты – жарандарды туруктуу жумуш орундары менен камсыз кылуу, жаштарды кесипке багыттоо жана иш берүүчүлөр менен жумуш издөөчүлөрдүн ортосунда түз байланыш түзүү болду.
Уюштуруучулардын маалыматына ылайык, Ысык-Көл облусу боюнча жалпы 1195 бош жумуш орду сунушталып, анын ичинен 280 бош орун Каракол шаарына тиешелүү болду. Катышуучулар өздөрүнө ылайыктуу жумуш орундар тууралуу маалымат алып, мекеме-ишканалардын өкүлдөрү менен жеринде маектешүү мүмкүнчүлүгүнө ээ болушту.
Жарманкенин жыйынтыгында 17 жаран дароо жумуш ордун таап, туруктуу иш менен камсыз болду. Мындан тышкары, көптөгөн жаштар кесиптик багыт берүүчү маалыматтарды алып, келечектеги эмгек жолуна байланыштуу пайдалуу кеңештерди алышты.
Белгилей кетсек, бош орундар жарманкеси жыл сайын салттуу түрдө Каракол шаардык мэриясы, Каракол шаардык эмгек жана социалдык камсыздоо бөлүмү, ошондой эле Жаш ишкерлерди колдоо борбору тарабынан уюштурулуп турат. Мындай иш-чаралар жарандардын иш менен камсыз болушуна көмөк көрсөтүп, шаардагы эмгек рыногун өнүктүрүүгө чоң салым кошууда.
