Өзбекстандан ташылып келе жаткан 24,7 тонна пияз артка кайтарылды
Суу ресурстары, айыл чарба жана кайра иштетүү өнөр жайы министрлигине караштуу Өсүмдүктөрдү химиялаштыруу, коргоо жана карантин департаментинин Баткен аймактык башкармалыгы тарабынан кыргыз-өзбек мамлекеттик чек арасында жайгашкан “Кызыл-Кыя” фитосанитардык текшерүү постунда 2026-жылдын 22-майында фитосанитардык көзөмөл иш-чаралары жүргүзүлдү.
Министрликтин маалыматына караганда, Өзбекстан Республикасынан ташылып келинген жалпы салмагы 24,7 тонна пияз текшерүүгө алынып, анын таңгактарында маркировканын жок экендиги аныкталды.
Евразия экономикалык биримдигинин бажы чек арасында карантиндик фитосанитардык контролду жүргүзүү тартиби жөнүндө Жобонун талаптарына ылайык, аталган жүк кайра артка кайтарылды.
Министрлик тарабынан фитосанитардык коопсуздукту камсыздоо жана импорттук продукцияга болгон көзөмөлдү күчөтүү иштери туруктуу негизде улантылууда.
