Эрлист Акунбеков: Кыргызстан мөңгүлөрдү сактоого 80 млн доллар бөлгөн
Тажикстан Республикасына болгон иш сапарынын алкагында МинКаб Төрагасынын орун басары Эрлист Акунбеков “Суу туруктуу өнүгүү үчүн” 2018-2028-жылдардагы эл аралык иш-аракеттердин он жылдыгы боюнча IV жогорку деңгээлдеги эл аралык конференциянын расмий ачылышында сөз сүйлөдү. Бул тууралуу президенттик админстрациянын маалымат жана саясат бөлүмүнөн билдиришти.
Маалыматка ылайык, мөңгүлөрдүн эриши, жаан-чачындын азайышы жана суу ресурстарынын төмөндөшү бүгүнкү күндө бир мамлекеттин эмес, бүтүндөй Борбор Азия аймагынын көйгөйүнө айланганын белгилеп, “Мөңгүлөр болбосо – дарыяларда суу болбойт, суу болбосо – аймакта жашоо болбойт” деп билдирди министр.
Эрлист Акунбеков Кыргызстанда суу ресурстарын туруктуу башкаруу максатында 2040-жылга чейинки Улуттук суу стратегиясы иштелип чыкканын жана жаңы Суу кодекси кабыл алынганын маалымдады. Ал Кыргызстан аймактагы суу ресурстары толугу менен өз аймагында түзүлгөн жалгыз өлкө экенин белгилеп, суу-энергетика тармагында өз ара пайдалуу жана адилеттүү компенсация механизмдерин ишке ашыруу зарылдыгын айтты.
Министрдин айтымында, Кыргызстан өзүнүн суу ресурстарынын болгону 30 пайызын пайдаланат, калган бөлүгү коңшу өлкөлөр тарабынан колдонулат. Ошол эле учурда өлкө суу инфраструктурасын кармоого жана мөңгүлөрдү сактоого ири чыгымдарды жумшоодо: акыркы бир жылда суу тармагына 80 млн доллар, акыркы беш жылда 259 млн доллар бөлүнгөн.
Ошондой эле Эрлист Акунбеков Ысык-Көлдүн суусу азайып жатканын айтып, акыркы он жылдыкта көлгө куйган дарыялардын саны 100дөн 30га чейин кыскарганын белгиледи. Ал эл аралык өнөктөштөрдү көлдү сактоо жана калыбына келтирүү боюнча биргелешкен программаларды ишке ашырууга чакырып, 2027-жылы Кыргызстанда өтө турган “Бишкек+25” экинчи глобалдык тоо саммитине катышууга үндөдү.
