5 баллдык жер титирөөгө да камсыздандыруу төлөмүн берүү сунушталды
Жогорку Кеңеш турак жайларды табигый кырсыктардан милдеттүү камсыздандыруу боюнча мыйзам долбоорун экинчи окууда жактырды.
Жаңы өзгөртүүгө ылайык, эми 5 балл жана андан жогору болгон жер титирөөлөрдө камсыздандыруу төлөмүн берүү сунушталууда. Азыркы эрежеде төлөм алуу үчүн жер титирөө кеминде 6 балл болушу керек.
ӨКМ акыркы жылдары 5 баллдык жер титирөөлөр дагы турак жайларга олуттуу зыян келтирип жатканын билдирди. Мисалы, 2025-жылы Талас облусунда болгон жер титирөөдөн ондогон үйлөр жабыркаганына карабай, айрым тургундар компенсация ала албай калган.
Мындан тышкары, мыйзам долбоорунда шамал, катуу кар жана мөндүр сыяктуу кырсыктарда дагы камсыздандыруу төлөмдөрүн берүү каралган.
Ошондой эле камсыздандыруу компанияларынын туруктуу иштеши үчүн атайын камсыздандыруу фонду түзүлөт. Бийлик бул система жарандардын каржылык корголушун күчөтүп, камсыздандырууга болгон ишенимди арттырат деп эсептейт.
