Кыргызстанда чет өлкөлүк номурлуу унааларды легалдаштыруунун мөөнөтү узартылат
Кыргызстанда чет өлкөлүк номурлуу унааларды легалдаштыруу мөөнөтү узартылат. Бул тууралуу Жогорку Кеңештин төрагасы Марлен Маматалиев парламенттин жыйынында билдирди.
Жыйында депутат Дастан Бекешев чет элдик номурлуу унааларды мыйзамдаштыруу мөөнөтүн узартууну суранган жарандар көп экенин айткан.
"Президент да эл менен болгон жолугушууда бул процесс дагы узартылышы мүмкүн экенин билдирген. Элге так маалымат беришибиз керек, антпесе көп суроолор турат. 2025-жылы Кыргызстанга алынып келинген унаалар эмне болот, бул дагы маселе. Мен мыйзамдаштырууга скутерлерди да кошууну сурандым, алардын бир тобу өлкөгө мыйзамсыз кирген", - деди ал.
2025-жылы апрелден октябрга чейин Кыргызстанда абхаз, армян жана башка өлкөлөрдүн мамлекеттик номурлары менен жүргөн 30 086 унаа легалдаштырылган.
Убагында мыйзамдаштырылбаган 4 миңдей автоунаа чет өлкөлүк номур менен жүрөт. Анын ичинде 766 унаа атайын токтотмого коюлган.
