Араван районунда акысыз мобилдик клиника иштеп жатат
“Normeca Health Management” мобилдик мультидиагностикалык клиникасы Араван районунда акысыз медициналык кызмат көрсөтүп жатат. 2026-жылдын 9-мартынан бери 7625 бейтап кабыл алынып, 22 221 консультация жана 22 офтальмологиялык операция жасалды.
Президенттин Ош облусундагы өкүлчүлүгүнүн маалыматына караганда, бардык кызматтар калк үчүн толук акысыз. Клиника алыскы айыл-аймактар үчүн арналган жана 5 жылга эсептелген. Курамында 8 трейлер, 1 тез жардам, 2 микроавтобус, 2 пикап жана 1 спринтер бар.
Көрсөтүлүүчү кызматтар:
Консультация: үй-бүлөлүк врач, кардиолог, стоматолог, ЛОР, офтальмолог, невролог, гинеколог, эндокринолог, хирург, гастроэнтеролог, уролог
Диагностика: лаборатория, КТ, рентген, УЗИ, гастроскопия, колоноскопия, цистоскопия, маммография
Операциялар: катаракта, грыжа, варикоз, фибромэктомия, урологиялык жана башка чакан хирургиялык операциялар
Дары-дармек: 10 күнгө чейинки дарылар акысыз берилет.
Клиниканын иши 2021-жылдын 17-ноябрында Чүй облусунун Кемин районунда башталган. Андан бери жалпы 167 793 бейтап кабыл алынып, 569 652 консультация жана 328 062 изилдөө жүргүзүлдү.
“Normeca Health Management” клиникасы Араван районунда 2026-жылдын 6-июнуна чейин иштейт. Андан кийин Нарын облусуна баруу пландалууда.
