Арча-Бешик конушундагы мектепке 570 орундуу кошумча корпус курулууда
Бишкек шаарынын Арча-Бешик конушундагы №79 мектепке кошумча 570 орундуу окуу корпусу курулууда. Долбоор Курулуш министрлиги тарабынан ишке ашырылып, каржылоо республикалык бюджеттен каралган.
Курулуш министрлигинин маалыматына ылайык, объекттин курулушу үстүбүздөгү жылдын февраль айында башталган. Учурда үчүнчү кабаты көтөрүлүүдө. Башкы планга ылайык, мектептин жалпы аянты 1810 чарчы метрди түзөт.
Курулуштун сапаты жана аткарылып жаткан иштер Курулуш министрлигинин алдындагы тиешелүү департаменттер тарабынан көзөмөлдөнүүдө.
Мектеп пайдаланууга берилгенден кийин эки нөөмөт менен 1200гө жакын окуучунун билим алуусуна шарт түзүлөт.
