Чек арадан 31 баш койду мыйзамсыз өткөрүү аракети токтотулду
28-майда Лейлек чек ара отрядынын аскер кызматкерлери мамлекеттик чек ара аркылуу малды мыйзамсыз алып өтүүгө аракет жасалган фактыны аныкташты. Бул тууралуу Мамлекеттик чек ара кызматы билдирди.
Маалыматка ылайык, Талпак аймагында чек арадан болжол менен 150 метр аралыкта мамлекеттик чек араны көздөй айдалып бара жаткан 31 баш кой кармалган.
Чек арачыларды көргөн эки белгисиз адам малды таштап, окуя болгон жерден качып кетишкен. Койлор укук коргоо органдарына өткөрүлүп берилди.
Учурда ээлерин аныктоо жана окуянын бардык жагдайларын тактоо боюнча териштирүү иштери жүрүп жатат.
