Ош, Баткен облустарында заманбап логистикалык муздаткыч борборлор курулууда
Суу ресурстары, айыл чарба жана кайра иштетүү өнөр жайы министринин орун басары Рустам Балтабаев Good Neighbors International эл аралык уюмунун өкүлдөрү менен жолугушуу өткөрүп, өлкөнүн түштүгүндөгү соода-логистикалык инфраструктураны өнүктүрүү жана мындан аркы кызматташуу келечеги талкуулашты. Бул тууралуу аталган министрликтин басма сөз кызматынан билдирди.
Маалыматка ылайык, уюмдун өкүлдөрү Кыргызстандагы айылдарды комплекстүү өнүктүрүү долбоорунун (2021–2025-жылдар) ишке ашырылышынын жыйынтыктары, ошондой эле долбоордун экинчи фазасынын башталышы тууралуу маалымат беришти. Учурда Ош жана Баткен облустарында Чоң-Алай жана Кыргыз-Ата айыл өкмөттөрүндө заманбап логистикалык жана муздаткыч борборлор курулууда. Курулуш иштери аяктагандан кийин объекттер мамлекеттин балансына акысыз өткөрүлүп берилери жана фермердик кооперативдерди колдоодо, кошумча нарк чынжырчасын өнүктүрүүдө жана айыл чарба өндүрүүчүлөрүнүн рынокко чыгуу мүмкүнчүлүгүн кеңейтүүдө маанилүү инструмент болору белгиленди.
Жолугушуунун жүрүшүндө Рустам Балтабаев объекттерди өз убагында пайдаланууга берүү маанилүү экенин белгилеп, соода-логистикалык инфраструктураны өнүктүрүү ата мекендик айыл чарба продукциясынын атаандаштыкка жөндөмдүүлүгүн жогорулатуунун негизги шарттарынын бири экенин айтты. Тараптар ошондой эле айыл аймактарын өнүктүрүү, фермерлерди колдоо, калктын иш менен камсыз болушун жогорулатуу жана аймактардын экономикалык потенциалын бекемдөө багытындагы мындан аркы кызматташуу маселелерин талкуулашты.
