Ошто 3 ай аралыгында 560 миңден ашуун гүл отургузулган
30-майда Ош шаарында “Ош шаарын жашылдандыруу, көрктөндүрүү жана санитардык тазалоо боюнча жазгы үч айлыктын” жыйынтыгын чыгарууга арналган салтанаттуу иш-чара өттү. Иш-чарага Ош шаарынын мэри Жанарбек Акаев, шаардык Кеңештин төрагасы Болотбек Баетов, мекеме-ишканалардын жетекчилери, коомчулук өкүлдөрү катышты. Бул тууралуу Ош шаардык мэриясынын басма сөз кызматы билдирди.
Эске салсак, Президент Садыр Жапаровдун “Улуттук тазалык күнү” жана тиричилик калдыктарын иштетүү боюнча Жарлыгын ишке ашыруу максатында Ош шаарынын мэриясы 1-марттан 31-майга чейин жазгы үч айлык жарыяланган. Мэр Жанарбек Акаевдин тапшырмасы менен атайын штаб түзүлүп, шаар аймагында масштабдуу иштер жүргүзүлгөн.
Үч айдын ичинде Ош шаары боюнча 6150 куб метр таштанды чыгарылып, 133 чакырымдан ашуун ирригациялык тармактар жана каналдар тазаланды. Шаар аймагына 90 716 түп көчөт жана 560 миңден ашуун гүл көчөттөрү отургузулду.
“Оштогу көрктөндүрүү жана жашылдандыруу чарбакомбинаты” тарабынан 104 түп ийне жалбырактуу, 5121 түп жазы жалбырактуу бак, 1090 түп бадал, 50 миң түп роза гүлү жана 530 миңден ашуун гүл көчөттөрү отургузулду. Муниципалдык аймактык башкармалыктар, билим берүү жана саламаттыкты сактоо тармактары да жашылдандырууга активдүү салым кошушту.
“Ош-Тазалык” ишканасы шаардын кең көчөлөрүнө таштандыларды бөлүп таштоочу 50 даана, Н.Исанов көчөсүнө 100 даана таштанды үкөкчөлөрүн орнотту. “Ош шаардык жолдор” ишканасы 3000 чарчы метр темир, 4000 чарчы метр бетон тосмолорду сырдап, 600 чарчы метр жөө адамдар өтүүчү жол белгилерин жаңылады. Ал эми муниципалдык турак жай-коммуналдык ишканасы 18 көп кабаттуу үйдүн сырткы фасаддарын актап-сырдап чыкты.
Ошондой эле Ош шаарынын мэри Жанарбек Акаевдин демилгеси менен шаар аймагындагы рекультивацияланган 8 көрүстөндүн орду толугу менен жашыл аймакка айландырылып, 10 гектардан ашуун аянтка миңдеген бак-дарактар отургузулду. “Жашыл шаар” саясатынын алкагында бүгүнкү күндө Ош шаарынын ар кайсы аймактарында тамчылатып сугаруу системалары менен жабдылган 13 жаңы сквер жана заманбап сейил бактардын курулушу жүрүүдө.
