Токтогул суу сактагычында мыйзамсыз балык уулагандар кармалды
Экологиялык жана техникалык көзөмөл кызматы Токтогул суу сактагычынын Кодул тилкесинде мыйзамсыз балык уулоонун алдын алуу боюнча кезектеги түнкү рейддик иш-чара жүргүздү. Бул тууралуу аталган кызматтан билдиришти.
Маалыматка таянсак, рейддин жүрүшүндө балык кармоо үчүн тыюу салынган кытай үлгүсүндөгү синтетикалык торлорду жайып жаткан жеринен эки жаран кармалды. Аталган жарандарга карата административдик чара көрүлүп, ар бирине 11 000 сом өлчөмүндө айып салынды.
Ошондой эле рейд учурунда жалпы узундугу болжол менен 200 метрге жакын мыйзамсыз балык уулоочу торлор алынып, белгиленген тартипте конфискацияланды.
Белгилей кетсек, Министрлер Кабинетинин токтомуна ылайык айрым суу сактагычтарда балыкты кармоого мораторий киргизилген. Бул чара суу биоресурстарын сактоо, балык корун калыбына келтирүү жана экологиялык тең салмактуулукту камсыз кылуу максатында кабыл алынган.
Экологиялык жана техникалык көзөмөл кызматы жарандарды балык чарбачылыгы жаатындагы мыйзамдардын талаптарын так сактоого чакырат.
