Бишкекте курулуп жаткан мектептер текшерилди
31-майда Курулуш, архитектура жана турак жай-коммуналдык чарба министри Нурдан Орунтаев тиешелүү департаменттердин жетекчилери менен биргеликте Бишкек шаарында курулуп жаткан бир катар мектептердин курулуш иштеринин жүрүшү менен таанышты.
Курулуш, архитектура жана турак жай-коммуналдык чарба министрлигинин маалыматына ылайык, министр курулуп жаткан 4 билим берүү объектисин кыдырып, бир катар тапшырмаларды берди.
Министр курулуп жаткан 4 билим берүү объектисин кыдырып, бир катар тапшырмаларды берди.
Курулуп жаткан мектептер:
Достук айылында алгачкы жолу курулуп жаткан 750 орундуу мектеп;
Дордой конушундагы №94 мектепке курулуп жаткан 750 орундуу кошумча окуу корпусу;
Калыс-Ордо конушундагы №86 орто мектепке курулуп жаткан 650 орундуу кошумча корпус;
Биринчи Май районунун Садыгалиев көчөсүндө курулуп жаткан 1200 орундуу мектеп.
Нурдан Орунтаев объекттердеги курулуш иштеринин жүрүшү менен таанышып, белгиленген курулуш графигинен артта калып жаткан подряддык уюмдарга эскертүү берди. Ошондой эле курулуш иштеринин темпин күчөтүү, жумушчулардын санын көбөйтүү жана аткарылып жаткан иштердин сапатына өзгөчө көңүл буруу боюнча бир катар тапшырмаларды койду.
Мындан тышкары, подряддык уюмдарга мектептердин курулуш иштерин 2026 - 2027- окуу жылына карата өз мөөнөтүндө жана сапаттуу аяктоону, бардык иштерди заманбап курулуш талаптарына жана толук коопсуздук стандарттарына ылайык жүргүзүүнү талап кылды.
Белгилей кетсек, Президент Садыр Жапаровдун тапшырмасына ылайык, 2026-жылдын февраль айында Бишкек шаарында 20 жаңы мектептин курулушу башталган. Бүгүнкү күндө аталган объектилерде курулуш иштери активдүү жүрүүдө.
Анын ичинде:
Октябрь районунда – 6 объект;
Ленин районунда – 6 объект;
Биринчи Май районунда – 5 объект;
Свердлов районунда – 3 объект.
Долбоорлор Курулуш министрлиги тарабынан ишке ашырылып, республикалык бюджеттин эсебинен каржыланууда.
