Кыргызстанда насвайга тыюу салуу сунушталды
Кыргызстанда 2040-жылга чейинки демографиялык саясаттын концепциясынын алкагында тамеки жана алкоголдук продукцияларга карата талаптарды күчөтүү сунушталууда. Мындай демилге коомдук талкууга коюлду.
Маалыматка караганда, документке ылайык, насвайга толук тыюу салуу, алкоголдук ичимдиктерди жана тамекини сатып алуу үчүн жаш куракты 20-21 жашка чейин жогорулатуу, ошондой эле алардын түнкү убакта жана интернет аркылуу сатылышын чектөө каралууда.
Мындан сырткары, тамеки жана алкоголдук продукцияларга акциздик салыктарды жогорулатуу мүмкүнчүлүгү дагы талкууланууда.
Концепцияда өлкөдөгү өлүмдөрдүн 70 %га жакыны жугуштуу эмес оорулардан болору белгиленип, калкты сергек жашоо образына үндөө, энелер менен балдардын ден соолугун чыңдоо жана өмүр узактыгын жогорулатуу негизги максаттардын бири экени айтылат.
