Соң-Көлдөн миң метр мыйзамсыз тор табылды
Соң-Көл жана Ысык-Көлдө балык уулоого киргизилген мораторийге байланыштуу Соң-Көл аймагында рейддик иш-чаралар үзгүлтүксүз жүргүзүлүүдө. Бул тууралуу Нарын облустук ички иштер башкармалыгынан билдиришти.
Маалыматка ылайык, 30-майда жүргүзүлгөн рейддин жүрүшүндө Жумгал райондук ички иштер бөлүмүнүн кызматкерлери тарабынан Соң-Көл көлүнүн жээгиндеги Ак-Талаа районунун Таш-Дөбө тилкесинен 3 даана капка салынган, жалпы узундугу 1000 метрди түзгөн синтетикалык балык уулоочу тор табылып, алынган.
Мыйзамсыз балык уулоого каршы күрөшүү жана көлдүн экосистемасын сактоо максатында Жумгал райондук ички иштер бөлүмү тарабынан рейддик жана алдын алуу иш-чаралары мындан ары да улантылат.
