Суу ресурстары кызматына 14 мобилдик устакана тапшырылды
1-июнда Министрлер Кабинетинин Төрагасынын орун басары – министр Эрлист Акунбеков Суу ресурстары кызматына ирригациялык инфраструктураны тейлөө үчүн 14 мобилдик устакананы тапшырды. Бул тууралуу Айыл чарба министрлигинин басма сөз кызматы билдирди.
Маалыматка караганда, техника Европа реконструкциялоо жана өнүктүрүү банкынын колдоосу менен ишке ашырылып жаткан “Чүй облусунда суу ресурстарын пайдалануунун натыйжалуулугун жогорулатуу” долбоорунун алкагында берилди. Мобилдик устаканалар гидротехникалык объектилерде оңдоо иштерин ыкчам жүргүзүүгө жана ирригациялык системаларды эксплуатациялоонун натыйжалуулугун жогорулатууга мүмкүндүк берет.
Министр белгилегендей, суу чарба уюмдарынын материалдык-техникалык базасын жаңылоо агрардык тармакты суу ресурстары менен ишенимдүү камсыздоого жана өлкөнүн ирригациялык инфраструктурасын өнүктүрүүгө өбөлгө түзөт.
