Ак-Буура дарыясына агып кеткен баланын жансыз денеси табылды
Ош шаарында Ак-Буура дарыясына түшүп кеткен баланын сөөгү Өзбекстандын аймагынан табылды. Бул тууралуу ӨКМдин басма сөз кызматы билдирди.
Алдын ала маалыматтарга ылайык, 31-майда бир нече бала дарыяга түшүп жаткан учурда суунун деңгээли көтөрүлүп кеткен. Натыйжада балдар агын сууга кабылган. Төрт бала куткарылып, бирөө дайынсыз болуп жаткан.
ӨКМдин маалыматына караганда, издөө иштерине Ош шаардык башкармалыгынан 82 куткаруучу, дрон жана жалпы 128 адам тартылган.
Кийинчерээк 2017-жылы туулган А.Н. аттуу баланын жансыз денеси Өзбекстандын аймагындагы Ак-Буура дарыясынан табылган.
Учурда маркумдун сөөгүн алып келүү боюнча тиешелүү иштер жүргүзүлүүдө.
