Курулуш компаниялары эми чектеш аймактарды да көрктөндүрүүгө милдеттүү
1-июндан тарта Курулуш, архитектура жана турак жай-коммуналдык чарба министрлиги тарабынан курулуш объекттерин ишке ашырууда жанаша жайгашкан аймактарды көрктөндүрүүнү камсыз кылуу боюнча жаңы талаптар күчүнө кирди.
Министр Нурдан Орунтаев кол койгон буйрукка ылайык, көп кабаттуу турак жайларды, коомдук, административдик, коммерциялык жана өндүрүштүк объекттерди курууда курулуш компаниялары көрктөндүрүү иштерин милдеттүү түрдө жүргүзүүгө тийиш.
Алардын катарына кирүүчү жолдорду жана ички өтмөктөрдү куруу, тротуарларды уюштуруу, унаа токтотуучу жайларды түзүү, тышкы жарыктандыруу системаларын орнотуу, жаан-чачын сууларын агызуу тармактарын куруу жана жашылдандыруу иштери кирет.
Мындан тышкары, курулуш иштеринен улам бузулган жолдорду калыбына келтирүү жана жөө жүргүнчүлөргө, жакын жайгашкан турак жайларга жаралган ыңгайсыздыктарды жоюу талап кылынат.
Жаңы тартипке ылайык, көрктөндүрүү иштери курулуш жүргүзүлүп жаткан жер тилкесинин чегинде гана эмес, зарыл болгон учурда ага чектеш аймактарда да аткарылат.
Министрликтин маалыматына ылайык, бул чечим шаардык чөйрөнүн сапатын жакшыртууга, калктуу конуштардын архитектуралык көрүнүшүн өнүктүрүүгө жана жарандар үчүн коопсуз, ыңгайлуу шарттарды түзүүгө багытталган.
