Кыргызстанда заманбап фармацевтикалык логистикалык комплекс курулат
"Кыргызфармация" мамлекеттик ишканасы эл аралык GDP стандарттарына жооп берген өздүк фармацевтикалык логистикалык комплексин куруу долбоорун ишке ашырууга даярдык көрө баштады.
Ишкананын маалыматына ылайык, долбоор Президентин Администрациясынын колдоосу жана Мамлекеттик мүлктү башкаруу боюнча мамлекеттик агенттиктин көмөгү менен ишке ашырылууда. Анын алкагында ишканага заманбап кампа комплексин куруу үчүн жер тилкеси бөлүнүп берилди.
Учурда адистер тарабынан техникалык тапшырма иштелип чыгып, алдын ала эскиздик долбоор даярдалды. Ошондой эле жер тилкесинин чек араларын аныктоочу алгачкы белгилер орнотулду. Долбоорлоо жана курулуш-монтаждоо иштеринин кийинки баскычтарына мыйзамда каралган жер трансформациялоо жол-жоболору аяктагандан кийин өтүү пландалууда.
Маалыматка ылайык, жаңы логистикалык комплекстин ишке кириши дары-дармек каражаттарын жана медициналык буюмдарды талапка ылайык сактоого, температуралык режимдердин так сакталышын камсыз кылууга жана дары-дармек корун башкаруунун заманбап системаларын киргизүүгө мүмкүнчүлүк түзөт.
Мындан тышкары, комплекс өлкө боюнча саламаттык сактоо уюмдарын дары-дармек жана медициналык буюмдар менен үзгүлтүксүз жана ишенимдүү камсыздоого өбөлгө болору күтүлүүдө.
