Жаңы окуу жылы 15-сентябрда башталат
Агартуу министрлиги жалпы билим берүү уюмдарында 2026–2027-окуу жылын 15-сентябрда баштоо жөнүндө чечим кабыл алды. Бул тууралуу аталган министрликтин басма сөз кызматы билдирди.
Маалыматка ылайык, Дүйнөлүк көчмөндөр оюндары, Шанхай кызматташтык уюмуна мүчө мамлекеттердин башчыларынын саммити, Кыргызстандын эгемендүүлүгүнүн 35 жылдыгына арналган иш-чараларга байланыштуу окуунун нөөмөтү жылдырылды.
Ал эми окуу жылын 2027-жылдын 25-майында аяктоо пландалууда. Окуу программаларын толук өздөштүрүү жана билим берүүнүн сапатын сактоо үчүн бардык зарыл чаралар көрүлөт.
Бул максатта билим берүү процессин уюштурууга айрым өзгөртүүлөр киргизилет. 6-11-класстын окуучулары үчүн окуу жыл ичинде ишемби күндөрү кошумча 8 окуу күнү өткөрүлөт.
Алардын графиги ар бир мектеп тарабынан өз алдынча түзүлүп, ата-энелер жана тиешелүү билим берүү органдары менен макулдашылат.
Ал эми 1-5-класстар үчүн мурдагыдай эле 5 күндүк окуу режими сакталат.
