723 долбоордук-сметалык документацияга экспертиза жүргүзүлдү
Курулуш, архитектура жана турак жай-коммуналдык чарба министрлигине караштуу Мамлекеттик экспертиза департаменти тарабынан 2026-жылдын январь–май айларында 723 долбоордук-сметалык документация боюнча экспертиза жүргүзүлдү. Бул тууралуу аталган министрликтин басма сөз кызматы билдирди.
Маалыматка ылайык, жыл башынан бери департаментке жалпысынан 882 даана долбоордук-сметалык документация келип түшкөн. Анын ичинен 723 даана долбоордук-сметалык документация боюнча долбоордук-техникалык экспертиза жүргүзүлгөн.
Учурда 173 долбоордук-сметалык документация кароодо турат жана алар боюнча экспертиза жүргүзүү иштери улантылууда.
Мындан тышкары, 234 долбоордук-сметалык документация аныкталган кемчиликтерди жоюу жана толуктоо үчүн кайра иштеп чыгууга кайтарылган.
Белгилей кетсек, курулуш тармагында ар бир курула турган объекттин долбоордук-сметалык документациясы милдеттүү түрдө мамлекеттик экспертизадан өткөрүлөт. Экспертизанын жыйынтыгы боюнча оң корутунду алынгандан кийин гана курулуш иштерин баштоого уруксат берилет. Бул талап курулуш объекттеринин коопсуздугун, сапатын жана техникалык нормаларга шайкештигин камсыз кылууга багытталган.
