Афганистандан баңгизат ташыган топтун уюштуруучусу кармалды
Ички иштер министрлиги Өзбекстан жана Тажикстандын укук коргоо органдары менен биргеликте Афганистандан чыккан баңгизаттарды ташуу жана таратуу менен алектенген трансулуттук кылмыштуу топтун ишмердүүлүгүнө бөгөт койду. Бул тууралуу ИИМдин басма сөз кызматы билдирди.
ИИМдин маалыматына ылайык, атайын операциянын жүрүшүндө мурда бир нече жолу соттолгон 1964-жылы туулган чет өлкөлүк жаран кармалып, анын жанынан 51 килограмм гашиш табылган.
Тергөө маалыматтарына караганда, шектүү баңгизаттарды Тажикстандан Кыргызстан аркылуу мыйзамсыз өткөрүп, андан ары Өзбекстандын аймагында таратууну уюштуруп келген кылмыштуу топтун жетекчиси болгон.
Учурда укук коргоо органдары кылмыштуу схеманын башка катышуучуларын, баңгизаттарды жеткирүү багыттарын жана мыйзамсыз аракеттердин бардык жагдайларын аныктоо боюнча тергөө жана ыкчам иштерди жүргүзүүдө.
