Баткенге төрөткана куруу маселеси көтөрүлдү
Cаламаттык сактоо министри Баткен облусундагы саламаттык сактоо уюмдарынын иши менен таанышты. Бул тууралуу аталган министрликтин басма сөз кызматы билдирди.
Баткен облусуна болгон иш сапарынын алкагында Cаламаттык сактоо министри Дамир Осмонов аймактагы бир катар саламаттык сактоо уюмдарына барып, калкка медициналык жардам көрсөтүүнүн шарттары, ошондой эле ишке ашырылып жаткан жана келечектеги инфраструктуралык долбоорлор менен таанышты.
Сапардын жүрүшүндө министр Кадамжай районунун Жалпы дарыгерлик практика борборуна барып, төрөт, реанимация, травматология, терапия жана кардиология бөлүмдөрүнүн иши менен таанышты.
Мекеменин жетекчилиги министрге учурдагы муктаждыктар тууралуу маалымат берди. Атап айтканда, азыркы 25 орунга ылайыкталган төрөт бөлүмү калктын өсүп жаткан муктаждыктарына жооп бербей жаткандыктан, 90 орундуу жаңы перинаталдык борборду куруу зарылдыгы белгиленди. Ошондой эле авариялык абалда турган моргдун ордуна жаңы имарат жана жаңы тамак-аш блогун куруу маселелери көтөрүлдү.
