Суулардан мыйзамсыз 59 миң метр тор чыгарылды
2026-жылдын башынан бери суу түбүнөн жалпысынан 59 миң метр мыйзамсыз синтетикалык тор чыгарылды. Бул Бишкектен Токмокко чейинки аралыкка тете көрсөткүч. Ошондой эле көлдөр менен суу сактагычтардан 1 тоннадан ашык таштанды тазаланды. Бул тууралуу Экологиялык жана техникалык көзөмөл кызматынан билдиришти.
Маалыматка ылайык, Кыргызстандын көлдөрү менен суу сактагычтарында экологиялык коопсуздукту камсыздоо боюнча иштер күчөтүлгөн тартипте уланууда. Экологиялык жана техникалык көзөмөл кызматынын инспекторлору күнү-түнү рейддерди жүргүзүп, мыйзамсыз балык уулоого жана суу экосистемасына зыян келтирген фактыларга каршы күрөшүп жатышат.
Синтетикалык балык уулоочу торлорго тыюу салуу тууралуу мыйзамдын талаптарын аткаруунун алкагында өлкөнүн ири суу объектилерин тазалоо боюнча масштабдуу иштер жүргүзүлдү.
Жүргүзүлгөн иштердин жыйынтыгында:
- Ысык-Көлдөн – 30 300 метр тор жана 860 килограмм таштанды;
- Токтогул суу сактагычынан – 26 400 метр тор;
- Киров суу сактагычынан – 1 500 метр тор жана 300 килограмм таштанды;
- Орто-Токой суу сактагычынан – 500 метр тор;
- Соң-Көлдөн – 300 метр тор чыгарылды.
Экологиялык жана техникалык көзөмөл кызматы Ысык-Көлдү, Соң-Көлдү жана өлкөнүн бардык суу байлыктарын сактоо боюнча иштерди мындан ары да улантат.
