Ак-Суу дарыясын булгаган айдоочуларга айып пул салынды
Суу ресурстары, айыл чарба жана кайра иштетүү өнөр жайы министрлигине караштуу Жерди жана сууну көзөмөлдөө боюнча кызматтын Бишкек шаары жана Чүй облусу боюнча аймактык башкармалыгы тарабынан жүргүзүлгөн көзөмөл иш-чараларынын жүрүшүндө Чүй облусунун Москва районунун аймагында жайгашкан Ак-Суу дарыясында мыйзам бузуу фактылары аныкталды.
Айыл чарба министрлигинин маалыматына караганда, оор жүк ташуучу автоунаа жана экскаватор дарыя суусунун булганышына жол берген. Мындай аракеттер айлана-чөйрөгө терс таасирин тийгизип, суу объектилерин коргоо боюнча мыйзамдардын талаптарын бузууга алып келет.
Аталган мыйзам бузуу фактылары боюнча тиешелүү административдик чаралар көрүлүп, транспорт каражаттарынын айдоочуларына 11 000 сом өлчөмүндө айып пул салынды.
Жерди жана сууну көзөмөлдөө боюнча кызмат жарандарды жана чарба жүргүзүүчү субъекттерди суу объектилерин коргоо боюнча мыйзамдардын талаптарын так сактоого чакырат.
