Араван району дизайн-кодго ылайык иретке келтирилүүдө
Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаментинин Араван райондук башкармалыгы Араван райондук мамлекеттик администрациясы менен биргеликте аймакты дизайн-коддун талаптарына ылайык иретке келтирүү иштерин жүргүзүүдө.
Курулуш министрлигинин маалыматына ылайык, бүгүнкү күндө С.Юсупов айыл аймагынын Б.Айдаров жана Ленин көчөлөрү, Достук айыл аймагынын Ош-3000 көчөсү, Керме-Тоо айыл аймагынын борбордук көчөлөрүндө иретке келтирүү иштери жүргүзүлүп жатат.
Дизайн-код Араван райондук мамлекеттик администрациясы тарабынан бекитилип, учурда райондун борбордук бөлүгүндө жана бир катар аймактарындагы коомдук имарат, мекеме жана соода жайларынын фасаддарынын сырткы көрүнүшү жаңыртылып, аталыштары жана жарнак такталары бирдиктүү үлгүдө орнотулууда.
Дизайн-код – бул райондун архитектуралык келбетин, көчө-жол тармагын, коомдук жана турак жай объекттерин бирдиктүү стилистикалык багытта өнүктүрүүнү камсыздаган документ. Анын негизги максаты - аймактын эстетикалык көрүнүшүн жакшыртуу жана жарандар үчүн коопсуз, ыңгайлуу жашоо чөйрөсүн түзүү болуп саналат.
