“Калыс Ордо” менен “Алтын Казык конуштарын бириктирген көпүрө пайдаланууга берилди
Бишкек шаарынын Биринчи май районунда “Алтын Казык” жана “Калыс-Ордо”конуштарын бириктирген жөө жүргүнчүлөр өтүүчү жаңы көпүрөнүн ачылышы болуп өттү. Бул тууралуу Бишкек шаардык мэриясынын басма сөз кызматы билдирди.
Маалыматка ылайык, жаңы инфратүзүмдүк объект район тургундары үчүн Төмөнкү Ала-Арча суу сактагычынын суу берүүчү каналы аркылуу коопсуз жана ыңгайлуу өтүүнү камсыз кылды. Ошондой эле көпүрө “Алтын Казык” конушунда жашаган жана күн сайын коңшу конуштагы мектепке барып келген окуучулар үчүн коопсуз жол түздү.
Көпүрөнүн ачылышына Биринчи май райондук администрациясынын башчысынын орун басары А.Байысов, №205 МАБдын жетекчиси, Кыргыз Республикасындагы Швейцария Конфедерациясынын элчиси Сироко Месерли, ошондой эле конуш тургундары жана коомдук активисттер катышты.
Көпүрөнүн курулушу жергиликтүү жамааттардын демилгелерин колдоого жана шаарды инфратүзүмдү жакшыртууга багытталган “Аракет” долбоорунун алкагында ишке ашырылды. Бул объект борбор калаанын жаңы конуштарын өнүктүрүүдөгү маанилүү кадам болуп, тургундардын коопсуздугун жогорулатты.
Долбоордун жалпы баасы 6,9 миллион сомду түздү. Анын ичинен 2,8 миллион сом “Аракет” долбоорунун алкагында Швейцария Конфедерациясы тарабынан каржыланса, 4,1 миллион сом Биринчи май райондук администрациясынын бюджетинен бөлүндү.
