Мыйзамсыз жүгүртүүдөн 33 кг баңгизат алынды
Баткен облусунда баңгизат каражаттарын мыйзамсыз жүгүртүү каналынын ишине бөгөт коюлду. “Баткен” бажысынын баңгизаттарды мыйзамсыз жүгүртүүгө каршы күрөшүү бөлүмүнүн жана Баткен облустук ички иштер башкармалыгынын баңгизаттарды мыйзамсыз жүгүртүүгө каршы күрөшүү башкармалыгынын кызматкерлеринин биргелешкен иш-аракеттеринин натыйжасында, мыйзамсыз жүгүртүүдөн 33 килограммдан ашык гашиш алынды.
Бажы кызматынын маалыматына ылайык, 2026-жылдын 22-апрелинде Кадамжай районунда 33 жаштагы жаран кармалган. Унаа каражаттарын текшерип кароо, өзүн текшерип кароо жана андан кийин кармалган адамдын жашаган жери боюнча жүргүзүлгөн тергөө аракеттеринин жүрүшүндө баңгизат каражаттары табылып, алынды.
Соттук-химиялык экспертизанын корутундусуна ылайык, алынган зат каннабис чайыры болуп саналат. Алынган баңгизат каражатынын жалпы салмагы 33 килограммдан ашыкты түздү.
Бул факты боюнча Кылмыш-жаза кодексинин 282-беренесинин 3-бөлүгү менен кылмыш иши козголду.
Кыргызстандын жана Өзбекстандын укук коргоо органдарынын мындан аркы биргелешкен ишинин алкагында коңшу мамлекеттин аймагында кошумча иш-чаралар өткөрүлдү. Натыйжада кошумча 14 килограмм гашиш жана 1 килограмм опий алынды. Ошондой эле аталган баңгизаттарды мыйзамсыз жүгүртүү каналынын ишине тиешеси бар деп шектелген Өзбекстандын жараны кармалды.
