10 млн сомдон ашык зыян келтирүүгө шектелип айыл өкмөттүн кызматкерлери кармалды
Кара-Суу районунда муниципалдык жерлерди мыйзамсыз сатуу фактысы боюнча үч адам кармалды. Бул тууралуу Ош облустук ички иштер башкармалыгынан билдиришти.
Маалыматка ылайык, Эсептөө палатасынын текшерүүсүндө Жоош айыл аймагындагы муниципалдык менчикке таандык жалпы аянты 4544 чарчы метр болгон жер тилкелери мыйзамсыз түрдө жеке менчикке өткөрүлүп кеткендиги аныкталган.
Аталган факты боюнча “Кызмат абалын кыянаттык менен пайдалануу” беренеси менен кылмыш иши козголуп, тергөө Кара-Суу РИИБине өткөрүлгөн.
Тергөөнүн жүрүшүндө мамлекетке 10 миллион 350 миң 200 сом өлчөмүндө зыян келтирилгени аныкталып, Жоош айылдык кеңешинин депутаты, сатып алуулар боюнча адис жана айыл өкмөтүнүн орун басары шектүү катары кармалып, убактылуу кармоочу жайга киргизилди.
Учурда бул ишке тиешеси бар башка адамдарды аныктоо боюнча тергөө иштери уланууда.
