Беларустун Премьер-министри калдыктарды кайра иштетүүчү ишканага барды
4-июнда Беларусь Республикасынын Премьер-министри Александр Турчин Кыргызстанга болгон расмий сапарынын алкагында Бишкек санитардык полигонунун аймагына барды. Бул тууралуу Бишкек шаардык мэриясынын басма сөз кызматы билдирди.
Маалыматка ылайык, Бишкек шаарынын мэри Айбек Жунушалиев конокту тосуп алып, 2025-жылдын декабрь айында пайдаланууга берилген таштандыларды сорттоочу ишкананын иши менен тааныштырды. Бул объектте калдыктар сорттолуп, андан кийин кайра иштетүү үчүн кийинки этаптарга жөнөтүлөт.
Сорттолгон материалдар Фере көчөсүндөгү заводго жиберилип, ал жерден шаарды көрктөндүрүүчү элементтер, анын ичинде отургучтар, люктар, лотоктор жана башка материалдар жасалат.
Өткөрүлгөн тендердин жыйынтыгына ылайык, объекттер үчүн технологиялык жабдууларды Беларустун "Сифания - Экотехника" компаниясы жеткирип берген.
Экинчи этап аяктагандан кийин, экотехнологиялык калдыктарды кайра иштетүү жана электр энергиясын өндүрүүчү завод Борбордук Азиядагы эң ири катуу калдыктарды кайра иштетүү жана электр энергиясын өндүрүү долбооруна айланат.
Долбоордун ишке ашырылышы экологиялык кырдаалды бир топ жакшыртып, шаарды кошумча таза электр энергиясы менен камсыз кылат.
