Мал доктурлар Суусамырда мониторинг иштерин жүргүзүштү
Жайыл районунда өткөн элдик жыйында жергиликтүү тургундар тарабынан Суусамыр өрөөнүндө мал жандыктарынын ооруп, өлүм учурлары катталып жаткандыгы тууралуу маселе көтөрүлгөн. Бул тууралуу алар Президентинин Чүй облусундагы ыйгарым укуктуу өкүлү менен жолугушуу учурунда билдиришкен.
Айыл чарба министрлигинин маалыматына караганда, жарандардын кайрылуусунун негизинде Ветеринария, мал чарбасын өнүктүрүү, жайыт жана тоют кызматынын адистери ыкчам түрдө Суусамыр өрөөнүнө барып, жеринде эпизоотиялык мониторинг иштерин жүргүзүштү. Мониторингдин жүрүшүндө адистер жайыттардагы малдын абалы менен таанышып, оорунун белгилери байкалган же шектүү деп табылган малдардан лабораториялык изилдөө жүргүзүү үчүн кан үлгүлөрүн алышты.
Текшерүүнүн алкагында төмөнкү иштер аткарылды:
Илдеттин түрүн тактоо жана алдын алуу максатында алынган кан үлгүлөрү Республикалык ветеринардык лабораторияга жөнөтүлдү;
Суусамыр өрөөнүндөгү мал көмүүчү жайлардын (биотермикалык чуңкурлардын) абалы текшерилип, санитардык-ветеринардык талаптардын сакталышы көзөмөлдөндү;
Мал ээлери жана жергиликтүү тургундар менен түшүндүрүү иштери жүргүзүлдү.
Жүргүзүлгөн мониторингдин жыйынтыгында Суусамыр өрөөнүндө жана жалпы Жайыл районунда эпизоотиялык абал туруктуу экени аныкталды. Учурда кырдаал тиешелүү кызматтардын көзөмөлүндө болуп, мал арасында кооптуу жугуштуу оорулардын жайылышына жол бербөө боюнча бардык зарыл чаралар көрүлүүдө.
Ветеринария, мал чарбасын өнүктүрүү, жайыт жана тоют кызматы мал ээлерин малдын ден соолугунда кандайдыр бир өзгөрүүлөр же оорунун белгилери байкалган учурда дароо жергиликтүү ветеринардык адистерге кайрылууга чакырат.
