Мындан ары ректор болуш үчүн окумуштуулук наам милдеттүү болбойт
Министрлер Кабинети мамлекеттик жогорку окуу жайлардын ректорлорун дайындоо тартибине өзгөртүүлөрдү киргизди.
Жаңы тартипке ылайык, эми мамлекеттик университеттердин жетекчилери үчүн окумуштуулук наамга ээ болуу милдеттүү талап болбойт.
Бирок талапкерлер жогорку билимге, илим кандидаты же PhD даражасына жана кеминде беш жылдык илимий-педагогикалык тажрыйбага ээ болушу керек.
Ошондой эле маданият жана искусство тармагындагы окуу жайлар үчүн мурдагы өзгөчө шарт сакталды. Бул багыттагы ЖОЖдордун жетекчилери илимий даражасы жок болсо да, маданият жана искусство жаатындагы ардактуу наамынын негизинде дайындала алышат.
Мындан тышкары, өзгөртүүлөр саламаттык сактоо тармагындагы жогорку окуу жайларга да жайылтылды.
Токтом расмий жарыялангандан кийин 10 күндөн соң күчүнө кирет.
