Нарын облусунун аймагына 20 см кар жаады
4-июнда саат 18:00дөн тартып Нарын облусунун аймагында нөшөрлөп жааган жаан-чачынга байланыштуу мүмкүн болгон өзгөчө кырдаалдардын алдын алуу жана абалды көзөмөлдөө максатында тиешелүү кызматтар күчөтүлгөн тартипте иш алып бара баштады. Облустук Жарандык коргонуу кызматтарына күч-каражаттарды даярдыкка келтирүү жана ыкчам чараларды көрүү боюнча тапшырмалар берилди. Бул тууралуу президенттин облустагы өкүлчүлүгүнөн билдиришти.
Алдын ала алынган маалыматтарга ылайык, Ат-Башы районунун Ак-Сай жана Арпа өрөөндөрүнө болжол менен 15-20 сантиметр калыңдыкта кар жааган. Буга байланыштуу 5-июнь күнү саат 07:00дө Ат-Башы райондук Жарандык коргонуу комиссиясынын жыйыны өткөрүлүп, аталган өрөөндөрдөгү малчыларды кошумча тоют менен камсыздоо иштерин уюштуруу чечими кабыл алынды.
Учурда жеринде абалды тактоо, жолдордун абалын баалоо жана зарыл болгон учурда кардан тазалоо иштерин жүргүзүү үчүн жол тейлөө мекемелеринин жана Өзгөчө кырдаалдар министрлигинин кызматкерлери жөнөтүлдү.
Ошондой эле Нарын районундагы Соң-Көл жайлоосуна болжол менен 7 сантиметр кар түшкөн. Азыркы тапта аймактагы кырдаал туруктуу болуп, мал-жандыктар үчүн кошумча тоют жеткирүүгө муктаждык жаралган жок.
Бүгүнкү күндө облуста түзүлгөн абалга байланыштуу облустук Жарандык коргонуу комиссиясынын кезектеги жыйыны өтүп жатат. Тиешелүү мамлекеттик органдар жана жергиликтүү бийлик өкүлдөрү тарабынан кырдаал тыкыр көзөмөлгө алынып, калктын жана чарба субъекттеринин коопсуздугун камсыздоо боюнча бардык зарыл чаралар көрүлүүдө.
