Бишкекте 900 орундуу мектеп курулууда
Курулуш, архитектура жана турак жай-коммуналдык чарба министрлиги тарабынан Бишкек шаарынын Түштүк-пландоо аймагында 900 орундуу жаңы мектептин курулушу жүрүүдө. Объекттин курулуш иштери 2026-жылдын март айында башталып, республикалык бюджеттин эсебинен каржыланууда. Бул тууралуу аталган министрликтин басма сөз кызматы билдирди.
Долбоорго ылайык, жалпы аянты 7000 чарчы метрди түзүп, беш блоктон турган мектеп курулууда. Анда, үч кабаттуу окуу корпусу, жыйындар залы, азык-түлүк сактоочу кампасы менен ашкана жана бардык талаптарга жооп берген спорт зал каралган.
Учурда курулуш аянтчасында 70тен ашуун жумушчу эмгектенип, курулуш иштери белгиленген нөөмөткө ылайык жүргүзүлүүдө. Объекттин курулушу министр Нурдан Орунтаевдин жеке көзөмөлүндө жүргүзүлүп, аткарылып жаткан иштердин сапатына өзгөчө көңүл бурулууда.
Мындан тышкары, объектти электр энергиясы менен камсыздоодо кайра жаралуучу энергия булактарын пайдалануу максатында күн панелдерин орнотуу мүмкүнчүлүгү каралып жатат. Бул чара объекттин энергиялык натыйжалуулугун арттырып,чыгымдарды азайтууга шарт түзөт.
