Бишкекте вакцина сактоочу кампа курулууда
Бишкек шаардык Мамлекеттик санитардык-эпидемиологиялык көзөмөл борборунун базасында заманбап вакцина сактоочу кампанын курулушу башталды. Бул тууралуу Саламаттык сактоо министрлигинин басма сөз кызматы билдирди.
Маалыматка ылайык, жаңы объект борбор калаанын иммунопрофилактика системасын чыңдоого багытталып, вакциналарды коопсуз сактоону, натыйжалуу бөлүштүрүүнү жана медициналык мекемелерди үзгүлтүксүз камсыздоону камсыздайт.
Жаңы кампа:
вакциналарды эл аралык стандарттарга ылайык сактоого;
Бишкектеги муздак чынжыр системасын бекемдөөгө;
саламаттык сактоо уюмдарына вакциналарды жеткирүүнүн ылдамдыгын жана ишенимдүүлүгүн жогорулатууга;
иммунобиологиялык препараттарды натыйжалуу пайдаланууга;
эпидемиологиялык коркунучтарга даярдыкты күчөтүүгө;
калктын эмдөө программаларына болгон ишенимин арттырууга мүмкүндүк берет.
Долбоор Кыргызстандын Саламаттык сактоо министрлиги, Республикалык иммунопрофилактика борбору, UNICEF жана Gavi, the Vaccine Alliance тарабынан колдоого алынууда.
Эл аралык өнөктөштөр вакциналарды сактоо, ташуу жана логистика жаатындагы заманбап чечимдерди киргизүүгө каржылык жана техникалык жардам көрсөтүшөт.
