Кыргызстанда 8 миңден ашуун бош жумуш орду бар
Эмгек, социалдык камсыздоо жана миграция министрлиги маалымдагандай, үстүбүздөгү жылдын 1-майына карата Кыргызстанда 8248 бош жумуш орду катталган. Эң чоң суроо-талап жумушчу адистиктерге байкалууда.
Учурда республикадагы расмий жумушсуздуктун деңгээли 1,4% түзөт. Иш менен камсыз кылууга көмөктөшүү кызматтарында каттоодо турган жумушсуздардын саны 60,2 миң адамга жетсе, алардын 38,7 миңи расмий түрдө жумушсуз макамын алган. Жыл башынан бери иш менен камсыз кылуу кызматтарына 54 807 жаран кайрылган.
Иш менен камсыз кылуу кызматынын көмөгү менен 4554 адам жумушка орноштурулган. Жумушсуздуктун деңгээлинин өсүшү жана эмгек рыногундагы талаптардын өзгөрүшү шартында жумушсуз жарандарды окутуу артыкчылыктуу багыттардын бири болуп саналат.
Жумушсуздардын атаандаштыкка жөндөмдүүлүгүн жогорулатуу жана эмгек рыногунун керектөөлөрүн эске алуу менен 2026-жылдын 1-майына карата 2697 жумушсуз жаран кесиптик окууга жөнөтүлгөн.
Эмгек рыногунда өзгөчө талап кылынган кесиптердин катарына компьютердик оператор, соода агенти, ашпозчу, косметолог, чач тарач, маникюрчу, массажист, визажист, котормочу, 1С программасы боюнча тажрыйбалуу бухгалтер, тигүүчү, электр-газ ширетүүчү жана сантехник-слесарь кирет.
