Унаа токтотуучу жайларга акы төлөбөгөндөргө айып пул салынат
Бишкек шаарынын мэриясы борбор калаанын тургундарына жана конокторуна акы төлөнүүчү муниципалдык унаа токтоочу жайларда транспорт каражаттарын жайгаштыруу кызматтары үчүн өз убагында акы төлөө керек экендигин эскертет. Бул тууралуу Бишкек шаардык мэриясынын басма сөз кызматы билдирди.
Маалыматка ылайык, унаа токтотуучу жайларды башкаруунун натыйжалуулугун жогорулатуу жана муниципалдык унаа токтотуучу жайларды пайдалануу эрежелеринин сакталышын камсыз кылуу максатында “Шаардык жол-транспорттук инфратүзүм” муниципалдык ишканасынын кызматкерлери “Жөө патруль” мобилдик тиркемесин колдонуп башташат. Бул тиркеме унаа токтотуучу орундардын пайдаланылышына мониторинг жүргүзүүгө, транспорт каражаттарынын жайгаштырылышын каттоого жана унаа орундардын толушун эсепке алууга мүмкүндүк берет.
Заманбап санариптик куралдарды колдонуу эсепке алуунун ачык-айкындуулугун жогорулатууга, унаа токтотуучу жайды пайдалануу эрежелеринин сакталышын натыйжалуу көзөмөлдөөгө жана жол кыймылынын бардык катышуучулары үчүн бирдей шарттарды түзөт.
Ошондой эле Укук бузуулар кодексинин 192-беренесине ылайык, акы төлөнүүчү муниципалдык унаа токтотуучу жайга (акы төлөөнүн жана убакытты эсепке алуунун автоматташтырылган системасы болгондо) транспорт каражатын жайгаштыруу үчүн белгиленген акыны төлөөдөн качуу – жеке жактарга 10 эсептик көрсөткүч өлчөмүндө, юридикалык жактарга 50 эсептик көрсөткүч өлчөмүндө айып пул салууга алып келерин эскертет.
Бул унаа токтотуучу жайлардын бардык колдонуучулары үчүн бирдей шарттарды камсыз кылууга, бош орундардын жеткиликтүүлүгүн жогорулатууга, аларды пайдалануу тартибин сактоого, унаа токтотуучу орундарды узак убакытка ээлеп туруу учурларын азайтууга жана шаарда ыңгайлуу чөйрөнү түзүүгө багытталган.
Бишкек шаарынын мэриясы айдоочуларды муниципалдык унаа токтоочу жайларды пайдалануунун белгиленген эрежелерин сактоого, унаа токтотуучу жайлардын акысын өз убагында төлөөгө жана акы төлөнүүчү муниципалдык унаа токтотуучу жайга транспорт каражатын токтоткондугу үчүн акы төлөбөө Кыргыз Республикасынын мыйзамдарында каралган жоопкерчиликке алып келерин эске алууга чакырат.
