Ошто балдардын өлүмүнүн санын азайтуу боюнча жыйын болду
Ош облусунда ымыркайлардын жана балдардын өлүмүн азайтуу маселелери боюнча штабдын жыйыны өтүп, ага Ош облусу боюнча саламаттык сактоо боюнча координатор Конуш Сакмаматов жана облустук саламаттык сактоо уюмдарынын жетекчилери катышты. Бул тууралуу Саламаттык сактоо министрлигинин басма сөз кызматы билдирди.
Маалыматка ылайык, балдардын өлүмүнүн учурдагы абалы, анын негизги себептери жана балдарга көрсөтүлүүчү медициналык жардамдын сапатын жогорулатуу боюнча көрүлүп жаткан чаралар тууралуу баяндама менен Ош облусу боюнча штаттан тышкаркы башкы педиатр, Ош облустар аралык клиникалык балдар ооруканасынын директорунун орун басары Адыл Алимкулов баяндама жасады.
Кеңешмеде 2026-жылдын I чейрегинин жыйынтыктары каралып, өлкөнүн түштүк регионунда балдардын ден соолугун коргоону күчөтүү боюнча кошумча чаралар аныкталды. Ымыркайлардын жана балдардын өлүмүнүн көрсөткүчтөрүнө кеңири талдоо жүргүзүлүп, өлүм учурларынын негизги себептери, ошондой эле баштапкы медициналык-санитардык жардам көрсөтүү уюмдарынын жана стационарлардын деңгээлинде балдарга медициналык жардам көрсөтүүнүн сапаты каралды.
