Кочкор-Атадагы дыйкан базарында текшерүү жүргүзүлдү
Суу ресурстары, айыл чарба жана кайра иштетүү өнөр жайы министрлигинин 19-майындагы протоколдук тапшырмасын аткаруу максатында Ноокен райондук ветеринардык жана фитосанитардык көзөмөл кызматынын инспекторлору тарабынан Кочкор-Ата шаарындагы дыйкан базарында текшерүү жүргүзүлдү.
Айыл чарба министрлигинин маалыматына ылайык, текшерүүнүн жүрүшүндө эт жана эт азыктарын сатуу жана сактоо шарттары, ошондой эле санитардык-гигиеналык талаптардын сакталышы көзөмөлдөндү. Натыйжада эт сатуучу жайларда санитардык талаптар негизинен аткарылып, сатылып жаткан продукциялар тиешелүү ветеринардык коштоочу документтер менен камсыздалганы аныкталды.
Ошол эле учурда айрым соода түйүндөрүндөгү муздаткыч жабдуулардын техникалык абалы боюнча оозеки эскертүүлөр берилди.
Мындан тышкары, базарда сатылып жаткан мөмө-жемиштердин курамындагы нитраттар текшерилип, алардын көрсөткүчтөрү белгиленген нормага ылайык экени аныкталды.
