Бишкекте эгемендүүлүктүн 35 жылдыгына арналган конференция өттү
2-октябрда Бишкек шаарында эгемендүүлүктүн 35 жылдыгына арналган "Эгемендүүлүк доорунда Бишкек шаарынын өнүгүүсү: жетишкендиктер, көйгөйлөр жана келечек" аттуу эл аралык илимий-практикалык конференция болуп өттү. Бул тууралуу шаардык мэриядан билдиришти.
Маалымдалгандай, конференцияга мэр Айбек Джунушалиев, шаардык кеңештин төрагасынын орун басары Жылдызбек Абдраимов, Кыргыз Республикасынын Баатыры Медеткан Шеримкулов, академик Акылбек Жапаров баштаган мамлекеттик ишмерлер, илимпоздор, архитекторлор, экологдор жана жаш окумуштуулар катышты.
Мэр өз сөзүндө мэриянын шаардык инфраструктураны өнүктүрүүгө кошкон салымын белгилеп, илимий коомчулук менен кызматташуу маанилүү экенин айтты. Ал катышуучулардын сунуштары борбор калааны өнүктүрүүдө эске алынарын кошумчалады.
Иш-чаранын негизги максаты - эгемендүүлүк жылдарындагы Бишкектин өнүгүүсүн талдоо, көйгөйлөрдү аныктоо жана келечектеги өнүгүү багыттарын иштеп чыгуу болду.Конференцияда шаар куруу, транспорт, экология, жашыл аймактар, маданият, инвестиция жана санариптештирүү маселелери талкууланды.
Жыйынтыгында Бишкектин туруктуу өнүгүүсүн камсыздоо боюнча сунуштарды камтыган резолюция кабыл алынды.
