Адылбек Касымалиевдин Беларуска болгон жумуш сапары аяктады
Министрлер кабинетинин төрагасы Адылбек Касымалиевдин 1-2-октябрда Беларуска болгон жумуш сапары жыйынтыкталды. Бул тууралуу министрлер кабинетинен билдиришти.
Маалым болгондой, сапардын алкагында ал Евразия өкмөттөр аралык кеңешинин кезектеги жыйынына катышты. Жыйында соода-экономикалык кызматташтык боюнча ондон ашык маселе каралып, бир катар документтерге кол коюлду.
Отурумдарга ЕАЭБге мүчө Армения, Беларусь, Казакстан, Кыргызстан, Россиянын өкмөт башчылары, ошондой эле байкоочу мамлекет Өзбекстандын Премьер-министри жана Иран, Куба делегациялары катышты.
Мындан тышкары Касымалиев ЕАЭБ өлкөлөрүнүн өкмөт башчылары менен биргеликте Беларусь Президенти Александр Лукашенко менен жолугушуп, интеграциялык кызматташтыкты өнүктүрүү маселелерин талкуулады.
Ошондой эле ал "Иннопром. Беларусь" эл аралык өнөр жай көргөзмөсүнө катышып, пленардык жыйында сөз сүйлөдү.
