А.Шыкмаматов: Журналисттерге дагы салыктык жеңилдиктер каралган
Президенттин креативдүү секторду салыктан бошотуу тууралуу жарлыгында каралган жеңилдиктерден Кыргызстандын жалпыга маалымдоо каражаттары да пайдалана алышат. Бул тууралуу Мамлекеттик салык кызматынын төрагасы Алмамбет Шыкмаматов билдирди.
Шыкмаматовдун айтымында, жарлыкта “Интернет маалыматтык-телекоммуникациялык тармагында жалпыга жеткиликтүү маалыматтарды, анын ичинде тексттик, графикалык, аудио жана видеоматериалдарды даярдоо, жайгаштыруу жана жайылтуу кызматтары” жөнүндө сөз болот.
“Журналисттер, редакциялар жана операторлор дагы ушул категорияга кирет. Ошондуктан жарлык аларга да тиешелүү жана алар жеңилдиктерден пайдалана алышат”, — деди Салык кызматынын башчысы.
Креативдүү сектор үчүн салыктык жеңилдиктерге карата айтылган сын-пикирлерге жооп берип жатып, Алмамбет Шыкмаматов бул чараларды дарыгерлер менен мугалимдерди салыктан бошотуу сунуштары менен салыштыруу туура эмес экенин белгиледи.
“Дарыгерлер менен мугалимдерди салыктан бошотуш керек деген сөздөр – манипуляция. Алар мамлекеттик бюджеттен миллиарддаган сом алышат. Ал эми блогерлерге жана креативдүү индустрия өкүлдөрүнө берилген салыктык каникулдар келечекте чоң экономикалык натыйжа берет”, – деди ал.
Ошондой эле ал бул жеңилдиктердин алдыдагы президенттик шайлоо менен эч кандай байланышы жок экенин айтты.
