Бишкек жана Кантта таза суу долбооруна 33 млн евро жумшалды
Бишкек жана Кант шаарларында суу менен камсыздоо жана саркынды сууларды тазалоо инфраструктурасын жаңылоо боюнча ири долбоор ишке ашырылды. Бул тууралуу 16-июнда Швейцариянын Кыргызстандагы элчилиги билдирди.
Маалыматка ылайык, долбоор Европа реконструкциялоо жана өнүктүрүү банкы, Швейцария өкмөтү, Европа Биримдиги жана Глобалдык экологиялык фонд тарабынан каржыланган.
Бишкекте долбоордун алкагында 28 млн евро жумшалып, 16 км канализациялык коллекторлор жана 2,6 км суу түтүк магистралдары орнотулду. Ошондой эле 35 терең суу кудугу курулуп, суу чарба объектилери үчүн атайын техникалар сатылып алынды, лабораториялар жаңыланды.
Кант шаарында 5,12 млн евро каражатка 26 км суу түтүктөрү жана 37,9 км бөлүштүрүү тармактары алмаштырылды. Мындан тышкары 6800дөн ашуун суу эсептегич орнотулуп, кудуктарды калыбына келтирүү жана жаңы кудуктарды куруу иштери жүргүзүлдү.
Долбоордун негизги максаты калкты ичүүчү таза суу менен камсыздоо жана саркынды сууларды тазалоо системасын жаңылоо экендиги белгиленди.
