“Борбордук лаборатория” мамлекеттик ишканасынын жетекчиси кармалды
УКМКнын кызматкерлери тарабынан “Борбордук лаборатория” мамлекеттик ишканасынын жетекчиси кармалды. Бул тууралуу атайын кызматтын маалымат кызматы билдирди.
Маалыматка ылайык, УКМК тарабынан 15-июнда иликтенип жаткан кылмыш ишинин алкагында Бишкек шаарынын ЖЭБине жеткирилген көмүрдүн сапаты боюнча лабораториялык изилдөөлөрдүн жыйынтыктарын жасалма түрдө тариздөө жана алардын иш жүзүндөгү көрсөткүчтөрүн олуттуу жогорулатуу схемасын уюштуруу фактылары боюнча Жаратылыш ресурстары министрлигине караштуу “Борбордук лаборатория” мамлекеттик ишканасынын жетекчиси М.К.кармалып, УКМКнын тергөө абагынын убактылуу кармоочу жайына киргизилди.
Ошондой эле М.К. тарабынан жыл сайын жылытуу мезгилине даярдык көрүү алкагында ЖЭБге көмүр жеткирүүчү жеке компаниялардын кызыкчылыктарын көздөп, алардын ишмердүүлүгүн колдоо фактылары аныкталган.
Анын мыйзамсыз аракеттеринин натыйжасында жылуулук электр борборунун техникалык жабдууларына олуттуу зыян келтирилип, Бишкек шаарынын экологиялык абалына терс таасир тийгизилген.
