Өлкөнүн генпрокурору Казанда өткөн КМШ өлкөлөрүнүн генпрокурорлорунун жыйынына катышты
Кыргызстандын башкы прокурору Малик Бектурганов Татарстандын Казань шаарында 1-октябрда өткөн КМШ өлкөлөрүнүн генпрокурорлорунун 24-жыйынына катышты.
Генпрокуратурадан билдиргендей жыйын үй-бүлөлүк баалуулуктарды коргоо, ошондой эле жашы жете электер арасында деструктивдүү контенттин жайылышынын алдын алууга багытталган.
Малик Бектурганов Кыргызстандын прокуратура органдарынын балдардын укугун санариптештирүү шарттарында коргоо, жашы жете электердин интернеттен коопсуздугу жана маалыматтык технологияларды колдонуу менен балдарга болгон кылмыштардын алдын алуу жаатындагы тажрыйбаларын айтты.
Жыйындын аягында катышуучулар жыйынтык протоколго кол коюшту жана маалыматтык технология сферасындагы кылмыштуулукка каршы биргелешкен эксперттер тобун түзүү жаатында Казань декларациясын кабыл алышты.
Иш-чарага Беларусь, Индия, Иран, Кытай, Казакстан, Пакистан, Орусия, Тажикстан, Өзбекстандын прокуратураларынын жетекчилери, ошондой эле ШОС диалогу боюнча шериктештер (Азербайжан Лаос, Мальдив, Монголия, Сауд Арабиясы,Түркия жана Шри-Ланка), байкоочу өлкөлөр катышты.
