Кыргызстан менен Венесуэла балык чарба тармагында кызматташат
Суу ресурстары, айыл чарба жана кайра иштетүү өнөр жайы министринин орун басары Рустам Балтабаев Венесуэланын Балык чарбасы жана аквакультура боюнча элдик бийлик министрлигинин өкүлдөрү жана Кыргызстандагы элчиси Росальба Ло Буэ менен онлайн жолугушуу өткөрдү.
Министрликтин басма сөз кызматынын маалыматына ылайык, жолугушууда тараптар балык чарбасы жана аквакультура тармагындагы эки тараптуу кызматташтыктын келечегин талкуулашты. Өзгөчө көңүл техникалык тажрыйба алмашууга, балык чарба өндүрүмдөрүнүн соодасын өнүктүрүүгө жана тиешелүү мекемелер ортосундагы кызматташтыкты күчөтүүгө бурулду.
Венесуэла тарап бул багытта кызматташууну кеңейтүүгө, анын ичинде техникалык, ветеринардык-санитардык жана укуктук маселелер боюнча өз ара аракеттенүүнү өнүктүрүүгө кызыкдар экенин билдирди.
Жолугушуунун жыйынтыгында тараптар кызматташууну кеңейтүүгө макулдашып, балык чарбасы жана аквакультура тармагында эки өлкөнүн өз ара аракеттенүүсүн өнүктүрүүгө багытталган эки тараптуу документти даярдоо маселесин улантуу боюнча келишти.
