Орусияда мигранттар айып пулду өз убагында төлөбөсө депортацияланат
Орусия чет өлкөлүк жарандардын милдеттүү медициналык кароодон өтүү тартибин бузгандыгы үчүн жоопкерчиликти күчөткөн жаңы мыйзамдык өзгөртүүлөрдү кабыл алды.
Кыргызстандын Орусиядагы элчилигинин маалыматына ылайык, медициналык кароодон өтүүдөн баш тарткан же андан качкан жарандарга 25 миңден 50 миң рублга чейин айып пул салынып, өлкөдөн чыгаруу маселеси каралышы мүмкүн.
Ошондой эле айып пул өз убагында төлөнбөсө, анын көлөмү эки эсеге көбөйүп, жаран милдеттүү түрдө депортацияланышы ыктымал.Мындан тышкары, коркунучтуу оорулары жок деген жасалма медициналык маалымкаттарды даярдоо жана сатуу үчүн кылмыш жоопкерчилиги каралган.
Белгилей кетсек, 2026-жылдын 1-сентябрынан тартып Орусияда 90 күндөн ашык болууну пландаган чет өлкөлүктөр өлкөгө кирген күндөн тартып 30 күндүн ичинде милдеттүү медициналык кароодон өтүшү керек.
Элчилик кыргызстандыктарды Орусиянын мыйзамдарын так сактоого чакырып, талаптарды аткарбоо айып пулга жана депортацияга алып келиши мүмкүн экенин эскертти.
